بەرهەم ساڵح: بایادی یەكیەتی بكەینە كاراكردنی حكومڕانی باش

لە یادی 45 ساڵەی یەکێتیدا بەڕێز د.بەرهەم ڕایگەیاند: یەکێتی کوانوی مەشخەڵان و ئیرادەی ھەڵسانەوەی تێکۆشەرانی ئازا و نەبەزە لەڕۆژگارەکانی شکست و نائومێدیدا بە سەرکردایەتی ڕێبەری مەزن مام جەلال و ھاوڕێکانی. 

دەقی پەیامەکەی بەڕێز د.بەرهەم ساڵح سەرۆک کۆماری عێراق

كەسوكاری سەربەرزی شەهیدان،

جەماوەری دڵسۆزی یەکێتی نیشتیمانی کوردستان

هەڤاڵانی هاوسەرۆك و ئەندامانی ئەنجومەنی سەركردایەتی یەكێتی، 

یادی دامەزراندنی 45 ساڵەی یەکێتی، حزبە تێکۆشەرەکەی ڕەنجدەرانی بیروبازوتان پیرۆزبێت.

یەکێتی لە مێژودا حزبی دەستەبژێرێکی بوێر و ھوشیار و جەماوەرێکی دڵسۆزە، کوانوی مەشخەڵان و ئیرادەی ھەڵسانەوەی تێکۆشەرانی ئازا و نەبەزە لەڕۆژگارەکانی شکست و نائومێدیدا بە سەرکردایەتی ڕێبەری مەزن مامجەلال و ھاوڕێکانی. 

ڕێبازی ڕەسەنی یەکێتی، ڕێبازی ئازادیخوازانە، ڕێبازی ڕوبارێک خوێنی شەھیدانە، ڕێبازی ڕەنجدان و کۆمەڵێک تێکۆشەری دێرین و پێشمەرگەی گیانبازە. یه‌کێتی نیشتمانی کوردستان ئه‌و هێزه‌یه‌ که‌ به‌ پاڵپشتی کۆمه‌ڵانی خه‌ڵک توانی سەرکەوتووانە سه‌رده‌می شۆڕش و خه‌باتی شاخ ببەستێته‌وه‌ به‌ قۆناغی رزگاری و ڕاپەڕین و دواتر دا‌مه‌زراندنی حوکمڕانی خۆبه‌خۆی کوردستان. 

یەکێتی خاوەن تۆماری سەروەری و داهێنانە لە مێژووی گەلی کوردستاندا. 

له‌م قۆناغه‌ هه‌ستیاره‌ی ئێستاشدا، لە رووبەڕووبوونەوەی پەتای کۆرۆنا و واقعی بارگرانی گوزەران و قەیرانی بژێوی هاووڵاتیان، و لە ئاست نیگەرانی و ناڕەزایی کەڵەکەبووی کۆمەڵانی خەڵک و چاوەڕوانیەكانیان، یه‌کێتی له‌به‌رده‌م پارێزگاری لە سه‌روه‌ری ڕابردوو و به‌رپرسیارێتی ئێستا و دوارۆژی گه‌ل دایە ھەتا هێز و توانای بۆ پەیڕەوکردنی ‌چاکسازی بنەڕەتی و دادپەروەری و ڕێزگرتن لە ئیرادەی دیمکراسی ئاڕاستە بکات. 

با یادی 45 ساڵەی دامەزراندنی یەکێتی ببێتە یادی یەکڕیزی ڕاستەقینە و سەربەخۆیی بڕیاڕی نیشتمانپەروەرانە، با یادی یەکێتی بکەین بە ڕۆژی بوژانەوەی بیروباوەڕ و گەڕانەوەی بەھاکان. بیکەین بەساتەوەختی کاراکردنی حوکمڕانی باش و دادپەوەر لەپێناو خزمەتکردنی شایستە بە میللەت و ھێنانەدی ماف و ئازادی و دیموکراسی و ئارامی و خۆشگوزەرانی بۆ هاووڵاتیان لە کوردستان و عێراقدا. 

دووبارە پیرۆز بێت یادی یەکێتی.

به‌رهه‌م ساڵح