تێ ناگەم

د.شێركۆ عبدلڵە

تێ ناگەم

*تێ ناگەم بۆچی جاران کاھوویان بە سرکەوە ئەخوارد

*تێم گەیەنن یەعنی چی کورد نەوتی ئیسرائیلی پێ دابین ئەکرێ کەچی کارەبای قالاوای لێ بووە بە تەیارە

*تێ ناگەم چۆن مێشوولە شەوان گیزەکەی ئەبێ بە ڤڕەی ھالیکۆپتەر

*کەس تێ ناگات حکومەتە قەرزارەکەمان ئەم چەند ساڵە نەوتی فرۆشتووە یان پۆکەری کردووە

*تێ ناگەم موعارەزە بۆچی ناچێتە بەر ئاوێنە سەیرێکی حاڵی خۆی بکات

*ئێستەش تێ نەگەیشتم ترساندنی مناڵ بە شەولەبان چ حیکمەتێکی پەروەرەدەیی تیابوو

*تێ ناگەم بۆچی ئەبێ جوگرافیای کوردستان بخوێنین؟ھەقە تفی تێ بکەین

*تێ ناگەم کێ فەیسبوکەوانی کوردی فێر کردووە لە دووەم چاتدا بپرسێ بڵێ چیت لەبەردایە

*تێ ناگەم توور موحتەرەمە یان بێ قیمەت؛مەدحی شتێک بکەن زۆر سپی و خۆش بێ ئەفەرمون ئەڵێی توورە،زەمی شتێکی بێ نرخیش بکەن ئەلێن توورێک ناھێنێ

*تێ ناگەم ئێمە ئەگەر ئەو پەڕلەمان و ئەنجومەن و شتانەمان نەبێ تووشی کەمیی چ ڤیتامینێک ئەبین

*تێ ناگەم ئەگەر کوردستان جێگەی بەچکەشێران بێ ،ئەو ھەموو ڕێوی یە چی ئەکەن لە بازاڕ و حیزبەکاندا