فارس نەوڕۆڵی
-
ھه‌ر بزوتنه‌وه‌یه‌كی سیاسی ڕه‌نگدانه‌وه‌ی ھه‌ل و مه‌رجی كۆمه‌ڵایه‌تی و بیركردنه‌وه‌ی ئه‌و كۆمه‌ڵگایه‌یه، لێره‌دا مه‌به‌ستمه قسه له‌سه‌ر مۆدێلی حیزبایه‌تی بكه‌م لێره و له‌وێ ، ئه‌گه‌ر بگه‌ڕێینه‌وه بۆ پێناسه كلاسیكییه‌كه‌ی حیزب ئه‌وا حیزب بریتیه له گروپێك یان كۆمه‌ڵه كه‌سێك كه به‌رژه‌وه‌ندی ھاوبه‌شی ئابوری و ئایدۆلۆجی سیاسی كۆیان ده‌كاته‌وه، به‌ڵام حیزب به مانا مۆدێرنه‌كه‌ی و له جیھانی پێشكه‌وتودا، حیزب ناوه‌ندێكه یان ده‌زگایه‌كه بۆ بیركردنه‌وه له‌سه‌ركۆی كایه‌كانی ژیان، له‌پێناو به‌رژه‌وه‌ندی گشتی و چاكه‌ی گشتیدا، ھه‌ر بۆیه حیزب به یه‌كێك له‌پایه‌كانی كۆمه‌ڵگای مه‌ده‌نی داده‌نرێ، بۆیه سروشت و بیركردنه‌وه‌ی حیزب له‌م مۆدێله پێشكه‌وتووه‌دا ، له‌سه‌ر بنه‌مای جیاوازی داده‌مه‌زرێ.
جیاوازی به‌مانای ڕكابه‌ری و قبوڵكردنی ئه‌وی دیكه بۆ دروستكردنی فه‌زایه‌ك بۆ پێشبڕكێ له‌پێناو چاكه‌ی گشتیدا و به‌ھێزكردنی وڵات له‌ڕێگای داھێنانه‌وه، ئه‌مه‌ش به گفتوگۆ و خستنه‌ڕوی به‌رنامه‌ی جوان بۆ به‌رچاوی ڕای گشتی، له دروستكردنی ئه‌م مۆدێله و له‌م ھه‌ل و مه‌رجه‌دا زه‌مینه ساز ده‌بێت بۆ دروست بونی تاكی ھۆشیار، ئه‌و كاته‌ی كه تاكی ھۆشیار دروست ده‌بێت ، تێگه‌شتنێكی دروست له ڕێگای گفتوگۆ له‌سه‌ر بابه‌ته‌كان و به‌زمانێكی ڕه‌خنه‌ی بنیادنه‌رانه بۆ مۆدێلی حیزب دروست ده‌بێت، زمانێك بۆ ڕاستكردنه‌وه نه‌ك بۆ ڕازی كردن، زمانێك بۆ پێزانین نه‌ك بۆ پیاھه‌ڵدان، بۆیه كۆمه‌ڵگایه‌كی ئه‌قڵ دروست و حیزبی ئه‌قڵ دروست به‌رھه‌م دێت.
ئه‌گه‌ر لێره‌دا ھه‌ڵوه‌سته‌یه‌ك بكه‌ین و به‌راوردی مۆدێلی حیزبایه‌تی مۆدێرن مۆدێلی و حیزبایه‌تی باو (ته‌قلیدی) بكه‌ین جیاوازییه‌كه‌یان مه‌زه‌نده ناكرێت ، مۆدێلی حیزبایه‌تی ته‌قلیدی و كلاسیك له‌م ناوچه‌یه‌دا له‌سه‌ر بنه‌مای ئایدۆلۆجیایه‌ك داده‌مه‌زرێ له‌بری جیاوازی قبوڵكردن، لێكدژی و نه‌فی كردنی ئه‌وی دیكه ده‌كاته بنه‌مای بیركردنه‌وه‌ی (چونكه كێشه‌ی ئایدۆلۆژیا له‌وه‌وه سه‌رچاوه ده‌گرێ بۆ ڕێگا چاره ناگه‌ڕێت و ڕای ئه‌وی دیكه‌ی قبوڵ نیه به‌ڵكو پێی وایه هه‌موو چاره‌سه‌ره‌كان لای حزبه‌كه‌ی خۆیه‌تی ئه‌م جۆره‌ش له حیزب ئاماده‌یی كه‌متریان هه‌یه بۆ ئه‌وه‌ی له‌گه‌ڵ هه‌ل و مه‌رجه گۆڕاوه‌كاندا خۆ بگونجێنن )، واته ژیانی خۆی له‌مردنی به‌رامبه‌ره‌كه‌یدا ده‌بینێته‌وه، بۆیه له‌بری دروستكردنی ڕكابه‌ر دوژمن دروست ده‌كا به‌رامبه‌ر یه‌كتر ئه‌مه‌ش واده‌كا جه‌ماوه‌ره‌كانیان وه‌ك دوژمن له‌یه‌ك بڕوانن، بۆیه ده‌وڵه‌ته‌كانی ناوچه‌كه مه‌رگی ئه‌وانی دیكه به ژیانی خۆیان ده‌زانن، چونكه ئه‌قڵی حیزبی ئایدلۆجی ده‌وڵه‌ته‌كان ده‌با به‌ڕێوه.
له‌ھه‌مان كاتدا ئه‌م مۆدێله له‌حیزب بۆمیلله‌تی بێ ده‌وڵه‌ت دوژمن لێكدژییه‌كانی ناوخۆیان ته‌وزیف ده‌كات بۆ بچوككردنه‌وه‌یان، لێره‌دا ئه‌گه‌ر سه‌یری مۆدێلی حیزب بكه‌ین له كوردستان به ڕاستگۆیانه دانی پێدا بنێین له‌بری به‌ڕێوه‌بردنی جیاوازی درێژه‌مان به قوڵكردنه‌وه‌ی دژایه‌تی داوه تا ئاستی دوژمنایه‌تی، بۆیه گه‌شتوینه‌ته ئێره‌یه‌كی ئاڵۆز و نادیار، كه‌واته ده‌بێ ئه‌م مۆدێله له‌حیزب بگۆڕین، گۆڕین له‌زمان ، گۆڕین له بیركردنه‌وه، گۆڕین له ئه‌خلاق، گۆڕین له‌كردار، ئه‌مه‌ش ده‌بێ له‌ڕێگای په‌روه‌رده‌یه‌كی نوێوه به گۆڕینی زمانی دواندنمان به‌رامبه‌ر یه‌كتر.
ئه‌گه‌ر بمانه‌وێ خه‌ڵك بێنینه سه‌رباوه‌ڕی خۆمان ده‌كرێ بێ ئه‌وه‌ی سوكایه‌تی به‌ھیچ حیزبێكی دیكه بكه‌یت و ھه‌ستی ھیچ كه‌س برینداركه‌ی ئه‌وه ده‌كرێ به‌شێوازێك بازاڕ بۆ خۆت بكه‌ی كردارێك بنوێنی له‌سه‌ر ئاستی گشتی قبوڵ بێت، كاردانه‌وه‌ی خه‌ڵكیش ده‌كه‌وێته سه‌ر ھێزی بیركردنه‌وه‌ی ھه‌ر لایه‌نێك بۆ قبوڵكردنی له‌ئاستی گشتیدا، ده‌بێ حیزبه‌كانی كوردستان بزانن ئێمه له‌گه‌ڵ به‌رجه‌سته كردنه‌وه‌ی ساته وه‌ختێكی مێژویی و سیاسی و گۆڕانكاری ناوچه‌كه‌یداین، بۆیه ده‌بێ حیزب بیركردنه‌وه‌ی بگۆڕێ و ته‌جاوزی ئه‌و مۆدێله و ئه‌و جۆره له كردار بكات له نه‌رێنی یه‌وه بۆ ئه‌رێنی، وه‌ك تۆڵستۆ ده‌ڵێ ( خراپه‌كاری خراپه‌كاری ناكوژێت وه‌ك چۆن ئاگر به ئاگرناكوژێته‌وه ) بۆیه ئه‌م جۆره ململانێیه له‌حیزبایه‌تی مێژوویه‌كه تاقی ده‌كه‌ینه‌وه ، ته‌نھا كاره‌ساتی به‌رھه‌مھێناوه ھیچ حیزبێك نه‌یتوانیوه ئه‌ویتر بسڕێته‌وه كه‌واته پێویسته حیزب ھه‌م وه‌ك فۆرم ھه‌م وه‌ك ناوه‌ڕۆك ده‌سكاری بكرێت، بۆ دروستكردنی فه‌زایه‌كی نوێ بۆ حیزبایه‌تی كه له‌گه‌ڵ گۆڕانكارییه‌كان و به‌رژه‌وه‌ندییه‌كانی وڵاتدا ھاوسه‌نگ بێت.
ليست هناك تعليقات
إرسال تعليق