شەوی رابردوو خۆپیشاندەران لە هەڵەبجە هێرشیان کردە سەر باڵەخانەی شارەوانی، قایمقامیەت، دادگا، مەڵبەندی یەكێتی و لقی 12ی پارتی، پارێزگای هەڵەبجەش لە کۆبوونەوەیەکدا هێرشکردنە سەر بارەگا حیزبی و حکومییەکانی بە "دەستی تێکدەر و دوور لە ئامانجی خۆپێشاندانەکان ناوبرد".
ئەمڕۆ یەکشەممە لە دیوانی پارێزگای هەڵەبجە ئازاد تۆفیق، پارێزگاری هەڵەبجە، جێگری پارێزگار، قایمقام و بەرپرسانی ئەمنی ئەو پارێزگایە کۆبوونەوە و سەرکۆنەی هێرشی خۆپیشاندەرانی شەوی رابردوویان بۆسەر چەند بارەگایەکی حکومی و حیزبی کرد.
بەپێی راگەیێندراوی کۆبوونەوەکە، ئازاد تۆفیق، پارێزگاری هەڵەبجە رایگەیاندووە، "ئەو شێوازە خۆپیشاندانە دوورە لەهەموو عورفێکی مەدەنی و هەڵەبجەییانە و هەموو ئیجرائاتێکی یاسایی دەگرینەبەر. دەستبردن بۆ مەلەفاتی حکومەت و دامودەزگەکان ناچێتە چوارچێوەی خۆپیشاندان و داواکاریی خەڵکیش نییە".
پارێزگاری هەڵەبجە داوایشی کرد خۆپیشاندانەکان بەشێوازی مەدەنیانە بکرێن و دووربخرێنەوە لە "ئامانجی تایبەت و تێکدەرانە"، هاوکات بە مافی رەوای هاووڵاتیانی زانی کە پێویستە حکومەت شایستە داراییەکانیان بۆ دابینبکات.
پێشتر عەمید كازم عەبدوڵڵا، بەڕێوەبەری پۆلیسی پارێزگای هەڵەبجە بە تۆڕی میدیایی رووداوی راگەیاند، لە خۆپیشاندانەکەی هەڵەبجە، بەردبارانی باڵەخانەی قایمقامیەت، دادگا، مەڵبەندی یەكێتی و لقی 12ـی پارتیان كراوە. بەڵام بەسام عەلی، بەرپرسی لقی 12ی پارتی لە هەڵەبجە گوتی "دوێنێ ئێمە تاکە لایەنی سیاسی بووین لە شاری هەڵەبجە، کە هێرشمان کرایەسەر".
دوێنێ شەممە 2020/08/22 خۆپیشاندان لە بەشێك لە شارەكانی كوردستان کرا. لە پارێزگای هەڵەبجەش خۆپیشاندان تاوەكو كاژێر 02:00ی بەرەبەیانی ئەمڕۆ یەكشەممە بەردەوام بووە.
ليست هناك تعليقات
إرسال تعليق