عێراق نووسینگەیەک بۆ چارەسەرکردنی کێشەی رزگاربووانی دەستی داعش لە شنگال دەکاتەوە

حکومەتی عێراقی نووسینگەیەک لە قەزای شنگالی سەر بە پارێزگای نەینەوا دەکاتەوە کە نووسینگەکە تایبەت دەبێت بە چارەسەرکردنی کێشە و گرفتەکانی ژنان و کچانی رزگاربووی کوردانی ئێزدیی دەستی رێکخراوی داعش لە قەزاکەدا.

لەو چوارچێوەیەدا عوسمان غانمی، وەزیری ناوخۆی عێراق بڕیاریدا نووسینگەیەکی تایبەت لە قەزای شنگال بکاتەوە، بەمەبەستی چارەسەرکردنی کێشە و گرفتی ژنانی رزگاربووی دەستی داعش، لەوانەش دەرکردنی ناسنامە بۆ منداڵانیان. ئەمەش دوای ئەوەی تیمێک پێکدەهێنرێت لە بەڕێوەبەرایەتیی ناسنامەی شارستانی و پاسپۆرت و نشینگە بە هاوئاهەنگی لەگەڵ دادگای عێراق.

ئەو بڕیارەی وەزیری ناوخۆی لەمیانی کۆبوونەوەیەکیدا هات لەگەڵ بەشێک لە ژنانی رزگاربووی کوردی ئێزدی.

چەکدارانی رێکخراوی داعش لە ساڵی 2014دا پەلاماری قەزای شنگالیان دا و کوردانی ئێزدییان کۆمەڵکوژکرد و 6417 کەسیان رفاند، کە 3548 ژن و 2869 پیاو بوون.

ژمارەی رزگاربووانی دەستی داعش 3537 کەسن، 1201 کەسیان ژنن، 1043یان منداڵی کچن، 954یان منداڵی کوڕ و 339 کەسیان پیاون.

ژمارەی ئازادنەکراوانیش 2880 کەسن کە 1304یان لە رەگەزی مێ و 1576 کەسیشیان لە رەگەزی نێرن.

خەیری بۆزانی، بەڕێوەبەری کاروباری کوردانی ئێزدی لە وەزارەتی ئەوقاف و کاروباری ئایینی هەرێمی کوردستان بە تۆڕی میدیایی رووداوی راگەیاند، پێشوازی لە هەر هەنگاوێک دەکەین، کە خزمەت بە کوردانی ئێزدی بکات، بەهۆی هێرش و پەلامارەکانی چەکدارانی داعش لە ساڵی 2014دا زۆربەی کوردانی ئێزدی ناسنامە و بەڵگەنامەکانیان سووتان، بۆیە گرفتی گەورەی بۆ دروستکردوون، هەروەها دەشڵێت "ئێمە هاوکاریمان کردوون بە هاوئاهەنگی لەگەڵ ئیدارەی خۆجێیی نەینەوا نزیکەی حەوت هەزار ناسنامە و پاسپۆرتیان بۆ دەرکردوون".

بەهۆی هێرشەکانی داعش، 1293 کوردی ئێزدی کوژران و کۆمەڵکوژ کراون، 310 هەزار کوردی ئێزدی ئاوارەبوون و نزیکەی 100 هەزاریان روویان لە هەندەران کردووە.