کۆنگرەی دەنگە ناڕازیەکان، پەیامێکی بڵاوکردەوە

کۆنگرەی دەنگە ناڕازیەکان، یاداشتێکی بۆ ڕای گشتی بڵاوکردەوە کە کە ئاراستەی سەرۆکایەتیەکانی هەرێم و دادگای فیدراڵی عێراق و وەزارەتی دەرەوەی ئەمریکا و بەریتانیا و نەتەوە یەکگرتوەکان و یەکیەتی ئەورووپاو و ڕێکخراوەکانی تایبەت بە مافی مرۆڤ و سەرجەم باڵێۆزخانە و قونسوڵیەکان لە بەغداد و هەولێر کردوە

لەو یاداشتەدا کۆنگرەی دەنگە ناڕازیەکان داوای ئازاد بوونی دەستگیرکراوانی چەند مانگی ڕابردوو دەکەن و تیایدا هاتوە( لێکۆڵینەوە لەژیانی رفێندراو و دەستگیرکراوەکانی ناو زیندانەکانی هەردو حیزبی دەسەڵاتداری هەرێمی کوردستان دەستپێبکەن و فشاریش بکەن بۆ ئازادکردنیان و لە بەرامبەردا بەرپرسانی هەرێم لەسەر ئاستی نێودەوڵەتی ڕوبەڕوی دادگا بکەنەوە، بۆ ئەمە چاوەڕێی هەوڵ و هیمەتتانین)

دەقی ڕاگەیەنراوەکە

بەڕێزان

سێ سەرۆکایەتییەکەی عێراق

دادگای فیدراڵی عێراقی

وەزارەتی دەرەوەی ویلایەتەیەکگرتوەکانی ئەمریکا

وەزارەتی دەرەوەی بریتانیا

سەرۆکایەتی نەتەوە یەکگرتوەکان

بەرپرسی پەیوەندییەکانی دەرەوەی یەکێتی ئەوروپا

رێکخراوەکانی مافی مرۆڤی جیهان

نێردەی نەتەوە یەکگرتووەکان، لە عێراق

سەرجەم باڵیۆزخانەی وڵاتان، لە بەغداد

سەرجەم کونسوڵخانەی وڵاتان، لە هەولێر

چەندین مانگە دەسەڵاتە خۆسەپێن و تاوانکارەکەی هەرێم، زیاتر لە ٧٥ مامۆستا و چالاکوانی بادینان و هەولێری ڕفاندوەو لە زیندانەکان بەندیکردون و مەترسی گەورە لەسەر ژیانی لانی کەم ٢٦ کەسییان دروستبوە. دەسەڵات دەیەوێت بە کۆمەڵێک تۆمەتی ناڕاست و هەڵبەستراو کەیسەکانییان بگۆڕێ، تاوەکو بە یاسای کۆنی سزادانی عێراقی و یاسای ڕوبەڕوبونەوەی تیرۆر دادگاییان بکات، لە دۆخێکی وادا سزاکانییان دەگاتە ٥ تا ٢٠ ساڵ زیندانی. ئەوەش لەکاتێکدایە، کە ئەو دەستگیرکراوانە ژمارەیەک هاوڵاتی و چالاکوانی مەدەنین و داوای موچە و دادپەروەریی و چاکسازی دەکەن و هیچ کاریکی نایاساییان ئەنجام نەداوە.

ئێوە دەزانن حکومەتی هەرێمی کوردستان رۆژانە نزیکەی 500 هەزار بەرمیل نەوت و بڕێکی زۆر گازی سروشتی دەفرۆشێت، هەروەها داهاتی شەش دەروازەی نێودەوڵەتی و داهاتی ناوخۆ و چەندینجار ٣٢٠ ملیار دینار لە عێراق و هاوکاری هاوپەیمانان وەرگیراوە، بەڵام بە دوو مانگ جارێک بە لێبڕینی ٢١%وە موچە دابەشدەکات و زۆرینەی داهاتی هەرێم بۆ بنەماڵە دەسەڵاتدارەکان و کۆمپانیا حیزبی و کەسییەکانییان دەڕوات.

لەبەرامبەردا هەر کەسێک خۆپیشاندان بکات، یان بە نیازی خۆپیشاندان بێت، لە لایەن هێزە ئەمنی و چەکدارە حیزبییەکانەوە بە دڕندانەترین شێوە لەسنوری دەسەڵاتدارێتی پارتی دیموکراتی کوردستان (هەولێر و دهۆک) ڕوبەڕوی لێدان و گرتن دەبێتەوە، بە هەمان شێوە لە سنوری دەسەڵاتدارێتی یەکێتی نیشتیمانی کوردستاندا (سلێمانی و هەڵەبجە)، لە چەند مانگی رابردودا ٧ خۆپیشاندەریان شەهیدکرد.

مەخابن لەبەرامبەر ئەم هەموو تاوانانەی دەسەڵاتدارانی هەرێمدا لەسەر ئاستی کۆمەڵگەی نێودەوڵەتی هەڵوێستێکی پێداگرانە نییە و تا ئەم ساتەش نەتانتوانیوە سنورێک بۆ پێشێلکاریەکانی مافی مرۆڤ لەم هەرێمەدا دابنێن. سەرانی هەرێمیش ئەم بێ دەنگییەیان قۆستوەتەوە بۆ بەرژەوەندی دەسەڵاتی رەهای خۆیان و واهەست ئەکەن لەسەرووی یاساو لێپرسینەوەوەن.

لە تازەترین نامەشدا کە لە ٢٩ی ١ی ٢٠٢١ کەسوکاری زیندانییەکان ئاڕاستەی خەڵکی کوردستان و رێکخراوەکانی مافی مرۆڤییان کردوە، بە ڕاشکاوی مەترسی خۆیان لەوە دەخەنە ڕوو کە ئەم دەسەڵاتدارانە، لە رێگەی دادگا بە حیزبیکراوەکانەوە باوک و کوڕو براکانییان بە تۆمەتی ناڕاستی قورس، ڕوبەڕوی حوکمدان بکرێنەوە.

لەم سۆنگەیەوە، داواکارین بەپەلە لێکۆڵینەوە لەژیانی رفێندراو و دەستگیرکراوەکانی ناو زیندانەکانی هەردو حیزبی دەسەڵاتداری هەرێمی کوردستان دەستپێبکەن و فشاریش بکەن بۆ ئازادکردنیان و لە بەرامبەردا بەرپرسانی هەرێم لەسەر ئاستی نێودەوڵەتی ڕوبەڕوی دادگا بکەنەوە، بۆ ئەمە چاوەڕێی هەوڵ و هیمەتتانین.

پەیامێکی تریشمان بۆ دامەزراوە فیدراڵیەکانی عێراق و رەوەندی کوردی و خەڵکی کوردستانە:

سەرەتا داوا لە نوێنەرانی کوردو کوتلەکانی تری ناو ئەنجومەنی نوێنەران و ئەنجومەنی وەزیرانی عێراق دەکەین کار بکەن بۆ دروستکردنی دادگایەکی تایبەت، بۆ ئەوەی لەوێوە فەرمانی دەستگیرکردن و داگاییکردن بۆ ئەو بەرپرسانەی هەرێم و شارەکانی دیکەی عێراقیش دەربکرێت، کە بە ئارەزوی خۆیان خۆپیشاندەران و رۆژنامەنوسان و چالاکوانان و هاوڵاتییان ڕوبەڕوی گرتن و لێدان و پاکتاوی جەستەیی دەکەنەوە.

هاوکات داوا لە ڕەوەندی کوردی ئەکەین، لە سەرجەم وڵاتان، دژی دەسەڵاتدارە خۆسەپێن و تاوانکارەکانی هەرێم بڕۆنە بەردەم نوێنەرایەتی نەتەوەیەکگرتوەکان و لە دادگاکانیش سکاڵا لەسەر ئەو بەرپرسانەی هەرێم تۆماربکەن، کە تۆمەتبارن بە دەستگیرکردن و شەهیدکردنی هاوڵاتییان.

لەم ڕوەوە دەتوانن کاری گەوەرەو کاریگەر بکەن و بەرپرسیارێتی نیشتیمانی و نەتەوەیی و مرۆیی ئێوەیە، دونیای دەرەوە لە ترسناکی ئەم دەسەڵاتەی هەرێم ئاگادار بکەنەوە.

دوا پەیاممان بۆ هانیشتیمانیانی کوردستانە، بەڕێزان، ئەم دەسەڵاتە بێ دەربەستە مەترسیدارەی هەرێم سودیان لە بێدەنگی ئێوە وەرگرتوە، با خۆمان بخەینە شوێنی منداڵ و خێزان و کەسوکاری زیندانییانی بادینان و هەولێر، با خۆمان بخەینە شوێنی کەسوکاری شەهیدەکان، ئایا چ ئازارو چ هەست و چ ژینێکمان دەبێ؟ ئایا تاکەی ئێمە لە ئاست ستەمی ئەم دەسەڵاتەدا نەبینە هاوئازارو هاوخەم و هاوخەباتی یەکتر؟ تا کەی سەرکزی و بێ دەنگی هەڵبژێرین؟ دڵنیابن بە بەردەوامبونی ئەم دۆخە، ئایندەیەکی مەترسیدار چاوەڕێی هەموومان دەکات.

کۆنگرەی دەنگە ناڕازییەکان

30/1/2021