لە یادی شەهیدبوونی محەمەد باقر حەکیم.. سەرۆك كۆمار: دۆخی سیاسی پێویستی بە پێداچوونەوەیەكی جدی و پەیمانێکی سیاسی نوێیە
سەرۆک کۆمار: پێویستە بە گیانێكی بەرپرسانەوە مامەڵە لەگەڵ ئەو پرسە هەستیار و چارەنوسسازانەدا بكەین و رێگە نەدەین عێراق دووبارە ببێتەوە گۆڕەپانێك بۆ پاكتاوكردنی بەرژەوەندییەكان لەسەر حیسابی گیان و ماڵی گەلی عێراق.
سەرۆك كۆمار د. بەرهەم ساڵح، لە وتارێکدا بە بۆنەی رۆژی شەهیدانی عێراق رایگەیاند، ئەمڕۆ یادی شەهیدبوونی كەسایەتیەكی گه‌وره و سەركردەیەكی نیشتمانیه كە رۆڵێكی گەورەی گێڕاوە لە رزگاركردنی گەلی عێراق لە ده‌ستی ستەمكاری و چەوساندنەوە و كۆمەڵكوژی.
سەرۆک بەرھەم راشیگەیاند، كاتێ یادی شەهیدی میحراب دەكەینەوە، ئەو رۆژە سەختانه‌مان بیردێنه‌وه كە گەلی عێراق رووبه‌ڕووی رژێمێکی دڕنده بووبوه‌وه که له رۆژهەڵات و رۆژئاواوە پشتیوانی لێدەكرا. به‌ڵام ئیرادە و خه‌باتی شەهیدی میحراب و مام جه‌لال شانبه‌شانی ئه‌وانی تر زه‌مینه‌یان بۆ روخاندنی رژێمی دیكتاتۆری ره‌خساند.
لە درێژەی وتارەکەیدا سەرۆک بەرھەم، شەهیدانی عێراقی وەبیر هەمووان هێنایەوە لە سوپا و پێشمەرگە و حەشدی شەعبی، و یادی قوربانیانی هەڵەبجە و ئەنفال و گۆڕە بە كۆمەڵەكانی مەحاویل و ناوەڕاست و باشوور و یادی قوربانیانی تیرۆر و هه‌روا یادی ئه‌و تێكۆشەرانه دەكەینەوە كە لە سه‌رانسه‌ری عێراق رووبەڕووی ستەمكاری و تیرۆر بوونەتەوە.
پێشتر ووتوومانەو دووبارە جەختی لەسەر دەكەینەوە، عێراقێكی سەقامگیر و خاوەن سەروەری و پارێزەری بەرژەوەندییەكانی هاووڵاتیانی، دەبێتە فاکتەرێکی بەھێز بۆ سەقامگیری بۆ تەواوی ناوچەكە، بەبێ سەقامگیری و سەروەری عێراق ناوچەكە ئارامی و سەقامگیریی بەخۆوە نابینێت.
دەقی وتاری سەرۆک کۆمار:
بەناوی خوای گەورە و میهرەبان
وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا ۚ بَلْ أَحْيَاءٌ عِندَ رَبِّهِمْ يُرْزَقُونَ
صدق الله العظيم
بەڕێز سەرۆك وەزیران
بەڕێز سەرۆكی ئەنجومەنی نوێنەران
بەڕێز سەرۆکی ئەنجومەنی باڵای دادوەری
بەڕێز سەرۆكی دادگای فیدراڵی
بەڕێز عەمار حەكیم
خوشك و برایان... ئامادەبووانی بەڕێز
سڵاوی خوای گەورەتان لێبێت
ئەمڕۆ یادی شەهیدبوونی كەسایەتیەكی گه‌وره و سەركردەیەكی نیشتمانیه كە رۆڵێكی گەورەی گێڕاوە لە رزگاركردنی گەلی عێراق لە ده‌ستی ستەمكاری و چەوساندنەوە و كۆمەڵكوژی.
سەماحەتی (محەمەد باقر حەكیم) نموونه‌ی خه‌باتکارێکی ئازابوو دژی سته‌مکاری و رژێمی دیكتاتۆری و هه‌وڵیدا بنه‌مای شه‌راکه‌تی راسته‌قینه لە كاری سیاسی له عێراقدا به‌رجه‌سته بکات. بەڕاستی ئەو بە مانای وشە كەسێكی تێكۆشەر و لە سیاسەت و ئاییندا شارەزا و پسپۆڕ بوو.
لەم رۆژدا یادی هه‌موو شەهیدانی عێراق دەكەینەوە، یادی هه‌ردوو شەهیدی سەدر و، هەموو ئەو شەهیدانە دەكەینەوە كە لە دژی ستەمكاری و دیكتاتۆرییەت و تیرۆر و توندڕەوی خەباتیان كردووە.
یادی شەهیدانی سوپا و پێشمەرگە و حەشدی شەعبی دەكەینەوە، یادی قوربانیانی هەڵەبجە و ئەنفال و گۆڕە بە كۆمەڵەكانی مەحاویل و ناوەڕاست و باشوور و یادی قوربانیانی تیرۆر و هه‌روا یادی ئه‌و تێكۆشەرانه دەكەینەوە كە لە سه‌رانسه‌ری عێراق رووبەڕووی ستەمكاری و تیرۆر بوونەتەوە.
لەم رۆژەدا ناکرێ رۆڵی شه‌هید محمد باقر حەکیم لەقۆناغی خەبات و تێكۆشان دژی دیکاتۆریه‌ت و بونیادنانی عیراقی نوێ له‌بیر بکه‌ین.
كاتێ یادی شەهیدی میحراب دەكەینەوە، ئەو رۆژە سەختانه‌مان بیردێنه‌وه كە گەلی عێراق رووبه‌ڕووی رژێمێکی دڕنده بوو بوه‌وه که له رۆژهەڵات و رۆژئاواوە پشتیوانی لێدەكرا. به‌ڵام ئیرادە و خه‌باتی شەهیدی میحراب و مام جه‌لال شانبه‌شانی ئه‌وانی تر زه‌مینه‌یان بۆ روخاندنی رژێمی دیكتاتۆری ره‌خساند.
من شه‌ره‌فمه‌ند بووم بە ناسینی شەهیدی میحراب لە نزیكەوە ئاگاداری هەڵوێست و بیروبۆچوونەكانی بووم، وەكو كەسێكی موجاهید و بەپەرۆش بۆ بەدیهێنانی یەكڕیزی نیشتمانی به رەچاوكردنی فرەره‌نگی كۆمەڵگای عێراقی ناسیومە. نیشتمانپەروەرێكی راستەقینە بوو، خەمخۆری خه‌ڵک بوو، هه‌میشه جەختی لە یەكڕیزی دەكردەوە بۆ رووبەڕووبوونەوەی ستەمكاری و دامەزراندنی سیستەمێكی نوێ لە عێراقدا.
شه‌هیدی میحراب نموونه‌ی تێكۆشان و قوربانیداندا بوو بۆیه پێویسته بۆ به‌دیهێنانی ئه‌و راستیانه شوێنشێی هه‌ڵبگرین و كاری سیاسی و كۆمەڵایەتی و كلتوریدا به‌رجه‌سته‌یان بکه‌ین.
ئەو تاریك پەرسانەی ئەو شەهیدە نەمرەیان تیرۆر كرد ویستیان ئەو چەمك و بەها باڵایانە تیرۆر بكەن كە لە پێناویاندا خەباتی كرد و بەپێگه‌‌ی مێژوویی ئه‌و بنەماڵه‌یه داکۆکی لێكرد كە رۆڵە هه‌ره دیاره‌کانی لە پێناوی بەرگریكردن لە مافەكانی گەلی عێراق و پرسە چارەنوسسازەكانی شەهید بوون.
خوشك و برایانی به‌رێز
یادكردنەوەی شەهیدانمان هەلێكە بۆ پێداچوونەوە بە ئەدای سیاسی و ئاگاداربوون لەو رێبازەی كە ئەوان بۆ ئێمەیان نه‌خشاند، ئەو رێبازەی شەو و رۆژ لە پێناوی گەل و سەروەری وڵاتەكەیاندا خەباتیان بۆ كردووە.
ئێمە ئەمڕۆ پێویستیەكی زۆرمان بە بوونی ئەو بەها باڵایانە و بەرجەستەكردنیان لە كاری سیاسیدا هەیە، پێویستمان بە یادكردنەوەی ئەو نەهامەتیانە هەیە که له‌قۆناغی بونیادنانی عێراقی نوێ چه‌شتمان كە بڕیار بوو خاڵی بێت لە تاكڕەوی و خۆسه‌پاندن و پشتگوێخستنی ئه‌وانی تر.
بە دڵنیاییەوە دۆخی سیاسی پێویستی بە پێداچوونەوەیەكی جدی و پەیمانێکی سیاسی نوێ هه‌یه که‌زامنی راستكردنەوەی ئاراستەی کارکردنمان بكات و لەگەڵ گۆڕانکارییەکانی ئێستادا گونجاو بێت و خواستی گەلی عێراق بەدیبهێنێت.
ئەوەی ئێستا عێراق پێیدا تێدەپەڕێت و ئەو گۆڕانكارییە ریشەییەی لە ناوچەكە و جیهاندا روودەدات، وامان لێدەخوازێت پشتیوانی یەكتر بین و لە ئاست برینەكانمان پشوو درێژ بین بۆ ئەوەی نیشتمان بگەیەنینە كەناری ئارامی و نەهێڵین بكەوێتە ناو گێژاوە مەترسیدار و نادیارەكانی لەناوچوون.
لێره‌وه دووپاتی ده‌که‌مه‌وه ئه‌رکی چاره‌نوسسازمان له‌به‌رده‌مه، دیارترینیان زەمینەخۆشكردنه بۆ ئەنجامدانی هەڵبژاردنێكی پاك و بێگەرد كە رێگەیەكی ئاشتیانە و دەستووری دروست بكات بۆ چاكسازی و گۆڕانكاری و رزگاربوون لە گێژاوی قەیرانەكان و بەدیهێنانی ئاواتی گەلی عێراق بۆ ژیانێكی شكۆدارانە و ئازاد و دەوڵەتێكی بەتوانا و نیشتمانی و خاوەنی سەروەری تەواو.
خۆئامادەكردن بۆ ئەنجامدانی هەڵبژاردنەكانی داهاتوو خواستی سه‌رجه‌م عیراقیه‌کانه، ئەوەش له‌رێگه‌ی دیالۆگێكی نیشتمانی سەبارەت بە پایەكانی دەوڵەت و چۆنێتی بەڕێوەبردنی و زامنکردنی مافی هاووڵاتیان. لێرە وەك دامەزراوەكانی دەوڵەت و هێزە سیاسیەكان پێویستە لە بەدیهێنانی ئەو خاڵەدا هیچ نەرمیەك نەنوێنین و هه‌وڵی جدی بۆ بده‌ین.
ئەركی سه‌ره‌کی تەواوكردنی هەنگاوەكانی چاكسازییە بە دیاریكراویش ئەنجامدانی هەڵبژاردنەكان لە كەشوهەوایەكی گونجاو و لە باردا بە جۆرێك پارێزگاری لە دەنگی گەلی عێراق بكرێت و دووربێت له هەڕەشه و ساختەکاری و فرتوفێڵ.
لە راستیدا ئێمە لە دوڕیانێكداین. یا دەبێت هه‌میشه گیرۆده‌ی ململانێ و ناكۆكییە ناوخۆییەكان و پرسه مه‌زهەبی و نەتەوەیی بین و پەرتەوازە و لاوازمان بکه‌ن، یا دەبێت بەرەو پرۆژەیەكی نیشتمانی ھەنگاو بنێن و دەوڵەتێكی نیشتمانی بونیاد بنێین كە ئیرادە و بڕیاری لە دەستی خۆیدا بێت و شكۆ و سەروەرییەكەی بپارێزین و بەبێ هەڵاوێردن و جیاكاری یاساكانی بەسەر هەموواندا جێبەجێ بكەین.
من لە پێگەی بەرپرسیارێتی نیشتمانییەوە، داوا لە هێزە سیاسییەكان و چالاكوانان و هه‌موو چین و توێژه‌کان دەكەم لە هەنگاوەكانی چاسازی نیشتمانیدا بەرپرسارێتی لە ئەستۆ بگرن و زمانی دیالۆگی بونیادنەرانە و سەرخستنی بەرژەوەندی گشتی وڵات بخەنە پێش هەموو شتێكی دیکەوە. چونكە چاكسازی بەبێ ئیرادەیەكی راستگۆ و راستەقینە بەدی نایەت و هیچ ده‌سکه‌وتێکیش بەبێ قوربانیدان نابێت.
چاكسازی تەنیا دروشم نییە.. بەڵکو بە ئیرادە و بڕیار و كردار دێتەدی.
عێراق پێویستی بە چاكسازییەكی گشتگیر و بونیاگەرانە هەیە. گەلی عێراق شایستەی لەوەباشترن كە تێیدان، بە دڵنیاییشەوە ئەو كارە لە شەو و رۆژێكدا بەدینایەت، لە كەشوهەوای كێشمەكێش و بە ئامانجگرتنی یەكتریشدا بەدی نایەت، چاكسازی پێویستی بە دڵی كراوە و ئەقڵی هۆشیار هەیە، عێراق بارودۆخ و تایبەتمەندی خۆی هەیە.
پێویستە بە گیانێكی بەرپرسانەوە مامەڵە لەگەڵ ئەو پرسە هەستیار و چارەنوسسازانەدا بكەین و رێگە نەدەین عێراق دووبارە ببێتەوە گۆڕەپانێك بۆ پاكتاوكردنی بەرژەوەندییەكان لەسەر حیسابی گیان و ماڵی عێراقییه‌کان.
پێشتر ووتوومانە و دووبارە جەختی لەسەر دەكەینەوە، عێراقێكی سەقامگیر و خاوەن سەروەری و پارێزەری بەرژەوەندییەكانی هاووڵاتیانی، دەبێتە فاکتەرێکی بەھێز بۆ سەقامگیری بۆ تەواوی ناوچەكە، بەبێ سەقامگیری و سەروەری عێراق ناوچەكە ئارامی و سەقامگیریی بەخۆوە نابینێت.
لەم رۆژە گرنگەی مێژوی عێراقدا، رۆژی شەهیدی عێراق، جەخت لە یەكبونمان دەكەینەوە بە ئومێدی ئەنجامدانی چاكسازییەكی بونیادنەرانە، جەخت لە یەك ریزیمان دەكەینەوە، گەلەكەمان شایستەی زیاترە، عێراق شایەنی ئەوەیە رۆڵی پێشەنگی خۆی لە ناوچەكە و لە جیهاندا بەدەست بهێنێتەوە.
سڵاو بۆ گیانی شەهیدە نەمرەكانمان به‌تایبه‌تی شه‌هید (ئایەتوڵا محمەد باقر ئەلحكیم)
ليست هناك تعليقات
إرسال تعليق