پارتی دوای 75 ساڵ لەنێوان دژبەری و ڕکابەریدا.

فارس نەورۆڵی

ئەم وتارە حوکم نییە، بەڵکو بیرکردنەوە و شیکردنەوەیە. پارتی دیموکراتی کوردستان لە دامەزراندنییەوە لە ململانێیەکی سەختدا بووە لەتەک داگیرکەرانی کوردستان، لەسەر بوونی کورد ئەوان هەرچیان پێکرابێ درێغیان نەکردووە، لە بەرامبەردا پارتی نەچەمیوەو بەهێزتر بووە، چونکە هێزی خاوەن مەسەلە فشاری دوژمنانی میللەتەکەی بەهێزتری دەکات. ( ئاخر ئەگەر کەشتی ترسی هەبێ لەهەڵکردنی زریان وتۆفان بۆهەمیشە دەبێت لەکەنار بمێنێتەوە ). مستەفابارزانی ئەگەر ترسی لەداگیرکەر هەبوایە نە دەچووە کۆماری کوردستان، نە پارتی دادەمەزراند. هەتا ئێرە بۆ پارتی و داگیرکەران و دژبەرانی کورد بوونە، چونکە لە گوتارێکدا ناتوانین ئەو مافە بەو مێژووە سەختە لە ململانێ و بەریەککەوتن لە نێوان پارتی و داگیرکەراندا وەک خۆی بخەینە ڕوو، بەڵکو پێویستی بە چەندین کتێب هەیە.

مەبەستمە باسی دۆخی ڕکابەری حزبی ئەم قۆناغەی ئێستای کوردستان بکەم بە تایبەتی پارتی و ئەوانی دیکە، ئەوکاتەی دەستەیەک لە هێزێک لە حزبێک جیا دەبێتەوە یاخود حزبێکی نوێ لە بەرامبەر حزبی خاوەن نفوس دروستدەکات، دەبێت لە پێناوی ئەوەدابێ ئەو حزبە ناتوانێ وەڵامی پرسیارەکانی ئەو قۆناغە بداتەوە، یاخود خزمەتی دۆزی گەلەکەی بکات. بۆیە هێزێکی نوێ لە دایک دەبێت بەرامبەر هێزی خاوەن نفوس خۆی مانیفێست دەکات.

ئەگەر پرسیار بکەین ئەو هێزانەی لە کوردستان خۆیان بە ڕکابەری پارتی دەزانن بۆ نەک نەیانتوانیووە پارتی تێبپەڕێنن، ناتوانن وەک پارتی بن؟ جارێ سەرەتا ئەوان نەیانتوانیووە پێناسەی پارتی بکەن، کە پارتی چییە و چی نییە؟ کە پێناسە کردنی ڕکابەر سەرەتای تێگەیشتنە لە گەمەی ڕکەبەرایەتی، لێرەوە بەشێک لە ڕکەبەرەکان کەوتوونەتە هەڵەی لۆژیکییەوە، چونکە لەبری ئەوەی بێن و ئەرگۆمێنتیان هەبێ لەسەر فیکر و ستراتیجی سیاسەتی پارتی، هاتوون ناو ناتۆرە بە پارتی دەڵێن و پەلاماری کەسایەتییەکانی پارتی دەدەن و بە لۆژیکی دۆنکیشوەتی سیاسەتی ڕکابەری بەڕێوە دەبەن، بۆیە دەرەنجام پارتی بەهێزتر دەبێت. ئاخر تۆ بتەوێ ڕکابەری لەتەک هێزێکی ڕەسەنی کوردستانی بکەی و بتەوێ گرەوی لێ ببەیتەوە بە هەندێ داشی شکاوەوە لە بەغداوە هێرش بکەیتە سەری و جوێن بارانی بکەی، تێنەگەی لەوەی میللەت لەوە هۆشیارترە تێدەگات بۆ لەو دوورە دەستەوە بەرد دەهاون، لە هەمووی زیاتر ئەوەیە ئەو ڕکەبەرانە بە خۆیان نەزانیووە خزمەتی گەورە بە پارتی دەکەن، هاتوون هەموو سیمبول و مەسەلە ستراتیجییەکانیان کردووە بە ماڵ و موڵکی پارتی، کە هەڵەیەکی لۆژیکییە و بێ بیرکردنەوەی عەقڵانی بڕیاریان لەسەر داوە.

بۆ نمونە باس لە ئاڵای کوردستان دەکەی دەڵێن ئاڵای پارتییە، باس لە سەربەخۆیی دەکەی دەڵێن دروشمی پارتییە، باس لە ئەی ڕەقیب دەکەی دەڵێن پارتی پێیخۆشە، باسی ئابووری سەربەخۆ دەکەی، دەڵێن پارتی لە پشتە. پرسیارەکە ئەوەیە ئایا هەموو مەسەلە ستراتیجی و ئامانجە گەورەکان هەمووی هی پارتییە؟ ئەی ئێوە چی دەکەن و خەریکی چین؟ ئەگەر ورد سایکۆلۆجیای ڕکەبەری بخوێنیتەوە، ڕکەبەرەکانی پارتی نەک نەیانتوانی پارتی تێبپەڕێنن ناشتوانن وەک پارتی بن. بۆ سەلماندنی ئەم ڕاستییە لە دیبەیتێکدا لەسەر دەستور کادرێکی پارتی پرسیاری لە بەرپرسێکی باڵای حزبێکی ئۆپۆزسیۆن کرد، کەی کاتی دەستورە؟ ئەویش لە وەڵامدا وتی کەی وەکو ئێوەمان لێهات. ئەمە ئەو وتەیەی فەیلەسوفی ئەڵمانی ( ئەرسەر شۆپنهاوەر) دێنێتە بیر، کە دەڵێ ( هەموو هونەرەکان هەوڵدەدەن بگەنە مۆسیقا، بەڵام ناگەن بۆ؟

لەبەر ئەوەی هەر هونەرەو چەند خەسڵەتێکی تایبەتی خۆی هەیە ) لە دنیای ڕکابەریشدا دەکرێ ئەم وتەیە تەوزیف بکەین و بڵێین ڕکابەرەکانی پارتی ئامرازەکانیان لاواز و بێ ئارگۆمێنتن، بۆیە نەک نەیانتوانیووە پارتی تێبپەڕێنن ناشتوانن وەک پارتی بن، لێرەشدا ناکرێ دوای ٧٥ ساڵ لە خەبات لە کەوتن و هەستانەوە بڵێین پارتی بێ هەڵەو کەم و کوڕییە، بە دڵنییاییەوە پارتی هەڵەو کەم و کوڕی هەیە، کە جێگای ڕەخنە لێگرتنە. بۆیە بۆ ئەوەی پارتی بە پێشەنگی بمێنێتەوە هەتا گەلی کورد دەگەیەنێتە لوتکە، پێویستە پێداچوونەوە بە کۆی کایەکاندا بکات و بەبیرکردنەوە یەکی نوێ ، کە لەتەک هەلومەر ج و دۆخی سیاسی وکۆمەڵایەتی و فیکری وڕۆحی سەردەمدا بگونجێت پەرە بەخەبات بدات.