عیراق.. تەنها لە مانگی رابردوودا زیاتر لە 6 هەزار جیابوونەوە تۆمارکراوە

ئەنجوومەنی دادوەری عیراق رایدەگەیەنێت، مانگی رابردوو زیاتر لە شەش ھەزار حاڵەتی جیابوونەوەی ھاوسەران لە عێراق تۆمارکراوە و پارێزگای بەغدادیش لە ریزبەندی یەکەمدایە.

 ئەنجوومەنی باڵای دادوەری عێراق، ئاماری مانگی یەکی ئەمساڵی سەبارەت بە دۆسیەی ھاوسەرگیری و جیابوونەوە لە عێراق بڵاوکردەوە و بەپێی ئامارەکە، ژمارەی ھاوسەرگیری نوێ لە مانگی کانونی دووەمی ڕابردوودا گەیشتووەتە زیاتر لە 26 ھەزار.

لە بەرامبەردا، حاڵەتەکانی جیابوونەوە شەش هەزار و 433 حاڵەت بووە، واتە لە ھەر رۆژێکدا نزیکەی 211 حاڵەتی جیابوونەوەی ھاوسەران لە عێراق تۆمارکراوە.

ھەر بە پێی ئامارەکە پارێزگای بەغداد لە ریزبەندنی یەکەمدایە و دوای ئەوەیش پارێزگاکانی نەینەوا و دیالە دێن.

بەشێکی چاودێرانیش ئەم دۆخەی عیراق بۆ خراپی دۆخی گوزەران و بێکاری و نەبوونی ژیانێکی شایستە، هاوکات لەگەڵ خیانەتی هاوسەرگیری دەگەڕێننەوە.