ميران طالب حمەفرج
١٤ ساڵ بەر لە ئێستا ڕۆژنامەنووس سەردەشت عوسمانی لاو، کە هەزاران خەونى گەورەی بۆ ئازادیی و ڕۆژنامەگەریی لەسەردا هەڵگرتبوو، دوای ئەشکەنجەیەکی زۆر بە چەند فیشەکێک، لە یەک کاتدا ئازادیی و خەون و ژیانیان لێ سەندەوە، تەنیا لە بەر ئەوەى بنەماڵە و سەرکردەکان لەم هەرێمە، ئارام و بێ ترس و بێ ڕەخنە بژین.
هەولێر، ئێستا و ڕابردووش کە زۆنێکی ڕەش و زیندانێکی گەورەیە بۆ ڕۆژنامەنووسان و کەسانى ئازادییخواز، سەردەشت عوسمان هات و تابۆی ئەو سامناکییەى تێکشکاند و بە دەنگێکی بەرز و زوڵال دژی حکومڕانییە خوار و خێچییەکانى دەسەڵات وەستایەوە.
سەردەشت عوسمان ٢٥ـی کانوونی یەکەمی ساڵی ١٩٨٧، لە خێزانێكی شاری هەولێر لە دایكبووە، ڕۆژنامەوان و خوێندكاری بەشی زمانی ئینگلیزیی کۆلێژی ئادابی زانکۆی سەڵاحەدین بوو.
ئەو ماوەیەك پێش تیرۆركردنی چەندین نووسینی ڕەخنەیی بڵاوكردەوە و دیارترینیان وتاری”من عاشقی كچەكەی بارزانی”ـم بوو، كە وتارەکە گوزارشت بوو لە نادادی كۆمەڵایەتی و نغرۆبوونی دەسەڵاتی پەدەكە لە گەندەڵی و حوکمڕانییەکى شکستخواردوو.
سەردەشت عوسمان وەک بڵێی بۆنی مەرگی خۆی كردبوو وابوو، چونکە پێش تیرۆركردنی لە وتارێكدا نوسیبووی: دوعاش دەکەم مردنێکی تراژیدیام پێببەخشن کە شایستەی ژیانە تراژیدیاکەم بێت، بۆیە ئەم قسانە دەکەم تابزانن گەنجەکانی ئەم وڵاتە چ ھۆلیسۆسێکن و مردن سادەترین ھەڵبژاردنیانە، بۆ ئەوەی تێبگەن کە ئەوەی ئێمە دەترسێنێت بەردەوامی ئەم ڕۆژگارەی ئێستایە بۆ نەوەیەکی داھاتوو، نەک مردنی خۆمان
ئەو خەمخۆری و ڕاشکاوییە سەردەشتى خستە ناو زائیدی ئەو ناخڕەشانەى کە لە ئازادیی و وشە دەترسان، تا دواجار لە کاتژمێر ٨ـی بەیانی ڕۆژی ٤ـی ئایاری ٢٠١٠ لەبەردەم زانکۆی سەڵاحەدین لە هەولێر لەلایەن ژمارەیەک چەکداری دەمامکداری سەر بە حزب و بنەماڵەوە ڕفێندرا و ڕۆژی ٥ـی ئایار لەسەر ڕێگای موسڵ تەرمەکەى بە شوێندراوی دۆزرایەوە.
چیرۆکی مەرگی سەردەشت تەنیا لێرەدا کۆتایی نەهات، بەڵکو دەسەڵاتی پەدەکە سیناریۆییەکی گاڵتەجاڕانە و قێزەونی داڕشت، ویستى ڕابردووی ئەو ناوبانگی پیشەییانەى ئەو ڕۆژنامەنووسە لەکەدار بكات و گەردنی خۆیان لەو تاوانە پاک بکەنەوە.
پەدەکە لە سیناریۆیەکی داتاشراودا ژمارەیەک کەسی ئامادەکراوی هێنایە سەر شاشە و وەک تیرۆرست بە ڕای گشتیی ناساندنی کە گوایە پەیوەندیان بەسەردەشتەوە هەبووە ویستوویانە کردەوەى تیرۆرستی لە هەولێر ئەنجام بدەن، ڕووخساری شێواوی ئەو کەسانە و نووسراوی سەر شاشەکەى بەردەمیان بۆ هەمووانى سەلماند کە سەردەشت تیرۆرست نەبووە و بەو جۆرە سیناریۆیانە ڕووی ڕاستەقینەى خۆیان زیاتر بە دونیا ناساند.
خێزانەكەی سەردەشت هەر زوو سیناریۆی پەدەكە و دەزگا ئەمنییەكانیان ڕەتكردەوە و ئێستا دوای ١٤ ساڵ هەر سوورن لەسەر ئەوەی سەردەشت لەسەر بیروبۆچوونەکانى شەهید کراوە و پیاوانى دەسەڵات لەو سنوورە شەهیدیان کردوە، بۆیە تا ئێستاش سازشیان لەسەر خوێنی ڕۆڵەکەیان نەکردوە و هەموو ڕێککەوتن و ئمیتیاز و دەستکەوتێکیان ڕەتکردوەتەوە، ئامادە نین خوێنی کوڕەکەیان بخەنە بازاڕی مامەڵەی پارەوە.
هێشتا ئەوانەی لە پشت تیرۆركردنی سەردەشتەوەن، نەک بە سزانەگەیندراون، بەڵکو بە ئازادیی لە هەولێردا بە بەرچاوی هەمووانەوە دەسوڕێنەوە و لەسەر ملهوڕیی و کوشتنى ئازادییەکان بەردەوامن، ڕۆژانە ئەو کەسانەی کە وەک سەردەشت دەنووسن و بیر دەکەنەوە دەیانخەنە زیندانەکانیان و ئەشکەنجەیان دەدەن و گیانیان لێدەسەننەوە.
دوای مەرگی سەردەشت ئێستا پەدەكە تیرۆركردنی دەنگە ئازادەكانی گۆڕیوە بۆ دروستكردنی سیناریۆ و تۆمەتی داتاشراو کە لە ڕێگەی دامودەزگا ئەمنییەكانیەوە و بەو دادگا حزبیەی دروستیان كردووە ئەشکەنجەیان دەدەن و لە زیندانی تاکەکەسی گۆشەگیریان دەکەن.
دوای ئەو هەموو ماوەیە لە ساڵی ٢٠٢٠ نزیكەی ١٠٠ ڕۆژنامەنوس و چالاكوانی مەدەنی لەلایەن پەدەكەوە لە بادینان دەستگیركران و هەریەكەیان بە شێوەیەك سزای زیندانی دران و ئێستاشی لەگەڵدابێت ژمارەیەكیان لە زیندانەكانی پەدەكەن و چاوەڕێی تەواوكردنی ماوەی سزاكەیانن.
چیرۆکی سلێمان ئەحمەدیش وەک هەموو چیرۆکەکانى دیکەى ڕۆژنامەنووسان ڕووی دەسەڵاتی پەدەکە و بنەماڵەى لە ناوخۆ و دەرەوە ڕەشکردووە، ئەوەتا دوای زیاتر لە شەش مانگ لە ڕفاندن و بێسەروشوێنکردنى، ئامادە نین نە شوێنەکەى ئاشکرا بکەن، نە ڕێگە بە تیمی پارێزەرەکانى دەدەن سەردانى بکات، تومەز دەیانەوێت بە هەمان زهنی تیرۆرکردنى سەردەشت، ئەویش بەو چارەنووسە بگەیەنن.
ليست هناك تعليقات
إرسال تعليق