خەواڵوویی بەردەوام ئەگەری تووشبوون بە لەبیرچوونەوە زیاددەکات

توێژینەوەیەک لە ئەمریکا دەریدەخات، ئەو بەساڵاچووانەی هەست بە خەواڵوویی دەکەن ئەگەری تووشبوونیان بە لەبیرچوونەوە زۆرە.

توێژینەوەکە لە کۆلێژی پزیشکیی ئەلبێرت ئەنیشتاین لە ئەمریکا لەسەر 445 کەس کرا و دەرکەوت، ئەو بەساڵاچووانەی بە درێژایی رۆژ هەستیان بە خەواڵوویی کردووە 45٪ ئەگەری تووشبوونیان بە لەبیرچوونەوە لە ساڵەکانی دواتریاندا زیادبووە.

د. ڤیکتۆر لیرۆی، نووسەری سەرەکیی توێژینەوەکە دەڵێت: پێویستە هەر کەسێک ماوەیەکی زۆر خەواڵوویی یاخود کێشەی خەوزڕانی هەبوو، لای پزیشكی پسپۆڕ چارەسەر وەربگرێت بۆ ئەوەی کاریگەری لەسەر توانا مەعریفییەکانی نەکات.

بە گوێرەی ناوەندی کۆنتڕۆڵ و پێشگیریکردن لە نەخۆشییەکان CDC لە ئەمریکا، ئەم هۆکارانە دەشێت ئەگەری تووشبوون بە نەخۆشییەکانی لەبیرچوونەوە زیادبکەن؛

- خواردنەوەی کحول

- کێشانی جگەرە و نێرگەلە

- کەمیی ڤیتامین D

- شەکرە

- نەخۆشییەکانی دڵ و لوولەکانی خوێن

- خەمۆکی

- قەڵەوی

- بەساڵداچوون

- کەمخەوی