لە بابەتی ڕەگەز گۆڕیندا بیرتان بۆ لای نێر و مێ نەچێت، بەڵکو ئەوەی لەوە مەترسیدارترە ئەو ڕەگەز گۆڕینەیە کە لە شاردا ڕوو دەدات.
تەنها کەمێك ورد ببنەوە لە پرسی زەوی و پرۆژەی بازرگانی و نیشتەجێ بوون، کە ماوەی چەند ساڵێکە لە پێشەنگی جوڵەکانە، ئاشنادەبیت بە وشەیەك یان ڕستەیەك کە بەو شێوازەی ئێستا هەیە شار وێران دەکات و دەیکاتە کاڵای بەرژەوەندیخوازی، بە جۆرێك کە دەکرێت ڕەگەزی هەموو شتێ بگۆڕن.
''ڕەگەزی هەمووشتێ ئەگۆڕن بۆ ئەو شتانەی وەك موگناتیس دۆلار کۆدەکاتەوە''
لە پڕ دوو تاوەری نیشتەجێکردن بە ئاسماندا دەچن و ناوێکیان لێ ناون و دەستیان بە فرۆشتن کردوە، کە بەدوایدا دەچیت و دەپرسی ئەم زەویە لە نەخشەدا خزمەتگوزاری بوو چۆن بوە نیشتەجێ بوون، یەکسەر پێت دەڵێن ڕەگەزەکەیان گۆڕیوە!، سەدان شوێن هەیە ڕەگەزەکەیان گۆراوە و لە بری بەرژەوەندی گشتی خراونەتە خزمەت بەرژەوەندی حیزب و کۆمپانیا و نوسینگەو ڕاوێژکارەکانیان!
ئەوەی دەیبینین زۆر ئاسان ڕەگەزی پارک دەگۆڕن بۆ نیشتەجێکردن یان بازرگانی، ڕەگەزی گەراج و قوتابخانە و دادگاو هەرچی بیانەوێ دەیگۆڕن، ڕەگەزی غابات دەگۆڕن بۆ شوقە و ڤێللا! ڕەگەزی دارستان و شاخ دەگۆڕن بۆ تاپۆی شەخسی، یان شوێنێکی نیشتەجێکردن مۆڵەتی چەن باڵەخانەیەکیان هەیە بەبێ ئەوەی لە نەخشەی مۆڵەت پێدراودا هیچ بازارێکی تێدابێت و بەدەستی دوو گەشتۆتە سەرمایەدار و دواتر ڕەگەزی بەشێکیان گۆریوە بۆ سەنتەری بازرگانی! چەندین دووکان ڕیز دەکەن وەك بەرهەمی ڕەگەز گۆڕین، ئێمە نەمانبینی یان نەمان بیستوە کە ڕەگەزی زەویەک لە بازرگانیەوە بگۆڕن بۆ باخچە و پارك یان قوتابخانە، ئەوەی هەیە ڕەگەزی هەمووشتێ ئەگۆڕن بۆ ئەو شتانەی وەك موگناتیس دەفتەرە دۆلار کۆدەکاتەوە.
"هیچ کات وەك ئەم چەند ساڵە کە قوباد تاڵەبانی بوەتە حاکمی یەکەمی ئیدارەی سەوز زەویەکانی سلێمانی تەخشان و پەخشان نەکراون"
لە هەموو قۆناغەکانی حکومڕانی کوردیدا گەندەڵی و بەهەدەردانی پارە و موڵکی گشتی هەبوە چ لە هەولێر و ئیدارەی پارتی و چ یەکێتی بە ئێستاشەوە. بەڵام هیچ کات وەك ئەم چەند ساڵە کە قوباد تاڵەبانی بوەتە حاکمی یەکەمی ئیدارەی سەوز زەویەکانی سلێمانی تەخشان و پەخشان نەکراون، لە داهاتوودا وردەکاری زیاتر لە تاڵانکردنی زەوی دەخەینە ڕوو، کێ سودمەندە و پشکەکان چۆن دابەشکراون بە هەموو ئەو شوێنانەی ڕەگەز گۆڕینیان بۆ کراوە.
لە بەرامبەریشدا کاتێك پرسەکە دێتە سەر زەوی و ئیمتیازاتی وارسی شەهیدان شارەوانی دەڵێت زەوی پێویستمان نیە و وەك فڕێدان زەویەکانیان دەخەنە دەرەوەی ئاوەدانی شار.
عوسمان عەبدوڵا گوڵپی
ليست هناك تعليقات
إرسال تعليق