تکایە هەواڵی ئەم جۆرە کوشتنانە ڕامەگرن

عوسمان گوڵپی

-

چەند ڕۆژێکە بە چەندین هۆکار ڕاگرتنی هەواڵی کوشتن بوەتە باسی میدیاکان و زۆرترین میدیاش پابەندیان ڕاگەیاندوە بە هەندێك لە میدیاکانی حیزبی دەسەڵاتیشەوە، تەنانەت داواکاری گشتی داواکاریەکی لەو جۆرەی لە ڕاگەیاندنەکان هەبوو کە ببێتە بڕیار

لێرەدا من خاڵە نەرێنی و ئەرێنیەکان جێدەهێڵم بۆ شارەزایان، بەڵام ئەوەی گرنگە ئەوەیە کە جیاوازی لە جۆری کوشتنەکان بکرێت و تەنها رێگە لە ڕووماڵکردنی ئەو کوشتنانە بکرێت کە هۆکاری کۆمەڵاتی و خێزانین و ئەمەش جێگای دەستخۆشیە لە ژێر کاریگەری لێکەوتە نەرێنیەکانی لەسەر کۆی کۆمەڵگە، بەڵام پێویستە میدیاکان زۆر باش ئەو کوشتن و خوێنڕشتنانە ڕووماڵ بکەن کە دەسەڵات و حیزبی حاکم ئەنجامیان دەدەن، ئێمە لە وڵاتێکداین کە بەشێك لە کوشتنەکان دەسەڵات یان ڕاستەوخۆ لە پشتیانەوەیە یان ئەندامانی هێزە ئەمنیەکانن و دەسەڵاتەکانیان و چەکی فەرمی بۆ کوشتن بەکار دەهێنن.

"ئێمە لە سنورێکی جوگرافیداین، ئەوەندەی چەکی مۆڵەتدار مەترسیە لەسەر ئاسایشی کۆمەڵایەتی و ژیانی خەڵك ئەوەندە چەکی بێ مۆڵەت مەترسی نیە"

خەتەرێکی گەورەیە بە پاساوی ڕووماڵ نەکردنی کوشتن ئەو خوێنانەی دەسەڵات دەیانڕێژێت پەردەپۆش بکرێن، ئەمە دەبێتە هاندەرێك و دەستکراوەیی دەسەڵات و حیزبە حاکمەکان بۆ ئاسانتر دەستبردن بۆ تیرۆر و کوشتن، بۆیە پێویستە میدیاکان زۆر فراوانتر لە جاران ئەو ڕووداوانە ڕووماڵ بکەن کە دەسەڵات و چەکدارەکانیان هۆکاری ئەنجامدانیانن.

بەداخەوە کە ئێمە لە سنورێکی جوگرافیداین کە ئەوەندەی چەکی مۆڵەتدار مەترسیە لەسەر ئاسایشی کۆمەڵایەتی و ژیانی خەڵك ئەوەندە چەکی بێ مۆڵەت مەترسی نیە، وە ئەوەندەی ئەو هێزانەی بۆ پاراستنی خاك و ئاسایشی خەڵك بوونەتە هۆکاری کوشتنەکان ئەوەندە مەترسیتر لە ئارادا نەبوە، هەموو کوشتنەکانیتر دەکرێت بە ئاسایی تەماشا بکرێن و لە کاتی هەڵکشاندا رێکاری رێگری زیاتر بۆ هەڵکشانەکە بکرێت کە یەکێکیان رێکخستنی میدیایە و دەکرێ لە هەموو کۆمەڵگەکانی دنیادا بە پێشکەوتوو و دواکەوتوەوە ڕووداوی کوشتن هەبێت بە رێژەی جیاواز، بەڵام کوشتن و تیرۆرکردن و تەسفیە حساباتە جیاوازەکان کە دەسەڵات و هێزە باڵادەستە جیاوازەکان لە پشتیانن و هۆکاری ئەنجامدانن لە هەموو وڵاتێکدا نین و تەنها لەو وڵاتانە دەبنە دیاردە کە یاسا هیچ رۆڵێکی نیە یان زۆر لاوازە تیایاندا.

بۆیە داوا لە ڕاگەیاندن و ڕاگەیاندن کاران دەکەم کە هیچ کات نەوەستن لە ڕووماڵی ئەو کوشتنانەی کەدەسەڵات یان هێزی سەربەدەسەڵات یان بە چەکی دەسەڵات ئەنجام دەدرێن تا هەموو کوشتنەکان دەبنە ڕای گشتی، گەر وانەبێ ئەوا دەسەڵات دەستکراوە دەبێت لە تەسفیە حسابات و نەیارو ڕەخنەگرەکان بە سیناریۆی جیاواز دەکوژن، ئەوکات نە میدیا باسیان دەکات و نە یاسایەکیش هەیە بۆ دادوەری، مەترسی جدی ئەوکاتە دەستپێدەکات کە دەسەڵات لە پشت کوشتنەکانەوەبێت و رێگربێ لە میدیا بە پاساوی رێگری لە ڕووماڵی کوشتن بیکاتە هەواڵ.